Nua pon ins s’infurmar davart il program per la proxima sessiun?

Il program da la sessiun e l’urden dal di da l’emprim di da la sessiun dal Cussegl naziunal e dal Cussegl dals chantuns vegnan publitgads duas emnas avant la sessiun en l’internet. A la fin d’ina sesida preschenta la presidenta u il president dal cussegl l’urden dal di dal Cussegl naziunal e dal Cussegl dals chantuns per il proxim di da la sessiun. Quel vegn publitgà immediatamain en l’internet.

Cura han lieu las sesidas dal parlament durant las sessiuns?

Las uras da las sesidas pon vegnir consultadas sin la pagina «Visita durant la sessiun». Las uras da las sesidas pon vegnir midadas a curta vista. Sche las uras da las sesidas vegnan scursanidas, na pon naginas ulteriuras gruppas entrar en la Chasa federala. Sche la visita n’ha betg lieu pervia da midadas da program a curta vista, na poi betg vegnir garantì che la sesida vegn cumpensada.

Co s’annunzian ins per ina visita durant la sessiun?

Sin la pagina d’internet «Visita durant la sessiun» chattais Vus tut las infurmaziuns davart l’annunzia sco er il link direct a la plattafurma da reservaziun online.

Cura vegn la reservaziun confermada?

Uschespert ch’ina reservaziun è terminada, retschavais Vus in e-mail da conferma cun in link a Vossa pagina da reservaziun persunala. Uschia pudais Vus consultar Vossas indicaziuns da tut temp e las modifitgar fin trais emnas avant Vossa visita.

Co accedan ins a las infurmaziuns da la reservaziun, sch’ins na chatta betg pli l’e-mail da conferma?

En cas che Vus avais stizzà per sbagl Voss e-mail da conferma cun il link direct a la plattafurma da reservaziun, po quel As vegnir tramess danovamain. Per quai stuais Vus trametter in e-mail a sessionsbesuche@parl.admin.ch. En cas che Vus avais nudà il numer da reservaziun, inditgai quel per plaschair. Cas cuntrari, inditgai Voss num e la data (approximativa) da Vossa visita reservada.

Datti in bigliet per la visita durant la sessiun?

Duas emnas avant Vossa visita retschavais Vus Voss bigliet per e-mail. Resguardai per plaschair ch’i pon entrar maximalmain tantas persunas sco quai ch’i èn inditgadas sin il bigliet. Il di da la visita èsi da preschentar il bigliet sin palpiri u electronicamain.

Pon ins spustar posteriuramain las uras sin tribuna?

Sch'il spazi da temp giavischà ed il dumber da plazzas necessarias èn libers, pudais Vus dumandar ina visita en in spazi da temp alternativ. Sche tut ils spazis da temp èn gia cumplets, na pon las uras reservadas sin tribuna betg vegnir spustadas.

Po l’ura da dumondas e/u la curta visita guidada en la halla a cupla vegnir organisadas avant la visita sin la tribuna?

Per motivs organisatorics e logistics pudain nus porscher mo in program standardisà. Il spazi da temp sin tribuna è fixà e definescha il program che suonda. I n’è betg pussaivel da midar il program da la visita.

Po vegnir reservà mintgamai mo in/-a cusseglier/-a dals chantuns ed in/-a cusseglier/-a naziunal/-a?

En il champ cun la glista da defilar pudais Vus tscherner mintgamai mo in/-a cusseglier/-a dals chantuns ed in/-a cusseglier/-a naziunal/-a. Sche Vus vulais anc endatar ulteriuras parlamentarias ed ulteriurs parlamentaris, scrivai lur nums en la fanestra per remartgas. Nus agiuntain alura ils nums ch’èn vegnids inditgads en quest champ a Vossa reservaziun ed infurmain las parlamentarias ed ils parlamentaris correspundents davart las uras ed il lieu da l’ura da dumondas. Las chombras parlamentarias ston però vegnir contactadas da la persuna responsabla per la gruppa.

Èsi pussaivel da scursanir la visita sin la tribuna da 60 a 30 minutas?

Na, per motivs organisatorics e logistics na pudain nus betg scursanir il temp sin la tribuna. Cun fin a 40 gruppas da visitadras e visitaders per di e causa las resursas da persunal limitadas sto vegnir resguardà in andament standardisà ed i na pon vegnir ademplids nagins giavischs singuls. Plinavant chaschuna ina midada suenter 30 minutas inquietezzas supplementaras sin las tribunas.

Poss jau er reservar dapli che 40 plazzas sin la tribuna?

Vus pudais reservar per dapli che 40 persunas. Per quai stuais Vus far duas reservaziuns. Sch’i èn libras en il spazi da temp giavischà mo pli tranter 41 e 49 plazzas e sche Vus vulais reservar tuttas, èsi impurtant ch’il dumber da plazzas a reservar saja adina pli grond che 10. Uschespert ch’il dumber da las plazzas restantas croda numnadamain sut 10, spareschan quellas da la plattafurma da reservaziun e na pon betg pli vegnir reservadas. Tscherni pia per omaduas gruppas in dumber ch’è pli grond che 10.

Èsi pussaivel d’annunziar online ina gruppa da 9 persunas?

Sche Vossa gruppa sa cumpona da stgars 10 participantas e participants, pudais Vus reservar 10 plazzas ed inditgar en la fanestra per remartgas ch’i èn mo 9. Nus faschain alura l’adattaziun per Vus.

Po ina persuna singula reservar plazzas sin la tribuna?

Per persunas singulas stattan a disposiziun 25 plazzas che na pon betg vegnir reservadas ordavant. Persunas singulas s’annunzian a l’entrada dals visitaders (da la vart da la Terrassa federala). D’entrar èsi permess sin il pli baud 30 minutas avant il cumenzament da la sesida e cuntinuadamain durant las uras da las sesidas, premess ch’i dettia anc plazzas libras. En cas d’in grond dumber da visitadras e visitaders stoi vegnir fatg quint cun temps da spetga pli lungs. Tals dis po il temp ch’ins dastga star sin la tribuna vegnir limità a 60 minutas.

Pon duas u pliras gruppas dumandar in program communabel?

Per reservaziuns che surpassan 40 persunas fan ins il meglier duas reservaziuns e dividan il dumber da participantas e participants sin omaduas reservaziuns. Cun agid da la fanestra per remartgas pudais Vus menziunar ch’i sa tracta da la medema gruppa e che Vus vulessas gugent salvar l’ura da dumondas communablamain.

Tge signifitga il code da stritgs sin il bigliet?

Il code da stritgs n’è actualmain anc betg activà. El vegn duvrà pir pli tard en connex cun las novas disposiziuns d’entrada.

Po il dumber da plazzas reservadas vegnir modifitgà tenor plaschair?

Il link che Vus avais retschavì en l’e-mail da conferma As maina directamain a la pagina da reservaziun. Il dumber da plazzas da Vossa gruppa da visitadras e visitaders pudais Vus adattar posteriuramain, premess ch’i sajan anc disponiblas plazzas libras. Sch’i cumpara in messadi d’errur cun empruvar d’augmentar il dumber da participantas e participants, èn tut las plazzas gia reservadas ed i na pon vegnir reservadas naginas plazzas supplementaras.

Pertge na pon vegnir fatgas pli naginas modificaziuns sin la pagina da reservaziun persunala?

Per motivs organisatorics pon vegnir fatgas modificaziuns sin la plattafurma da reservaziun mo fin trais emnas avant il di da la visita.

Dovri ina glista da las participantas e dals participants?

Na, i na dovra nagina glista da las participantas e dals participants.

Nua ston ins s’annunziar il di da la visita?

Vus pudais entrar en la Chasa federala sur l’entrada dals visitaders. Quella sa chatta da la vart da la Terrassa federala. La terrassa cuntanschais Vus nà da la Plazza federala sur las stgalas a dretga u a sanestra da la Chasa federala.

Cura ston ins arrivar il di da la visita?

Vegni per plaschair 30 minutas avant il cumenzament dal program da la visita per la controlla da segirezza.

Pon visitadras e visitaders che han retard anc sa participar al program ensemen cun lur gruppa?

Na, per motivs organisatorics na pon visitadras e visitadras che han retard betg pli vegnir reunids a lur gruppa. Sch’i èn anc disponiblas plazzas libras, pon visitadras e visitaders che han retard prender plazza sin la tribuna ch’è destinada a persunas singulas (che na po betg vegnir reservada ordavant).

Po in car sa fermar directamain davant la Chasa federala ed ans laschar sortir curtamain?

Davant la Chasa federala ost (en direcziun dal Hotel Bellevue) datti dus parcadis per cars, nua ch’igl è permess da sa fermar curtamain. Qua pon cars parcar per laschar sortir las viagiaturas ed ils viagiaturs ed als laschar entrar danovamain suenter la visita da la sessiun.

Nua pon cars parcar il meglier?

Cars utiliseschan il meglier las pussaivladads da parcar al Bärengraben.

Tgi beneventa las gruppas da visitadras e visitaders a l’entrada?

Las gruppas da visitadras e visitaders vegnan beneventadas a l’entrada dal persunal da segirezza. Quel declera a la gruppa co arrivar en il 2. plaun, nua ch’ellas vegnan alura accumpagnadas sin la tribuna.

Nua s’annunzian visitadras e visitaders en sutga cun rodas?

Visitadras e visitaders en sutga cun rodas utiliseschan per plaschair l’entrada nord a la Plazza federala. S’annunziai per plaschair là tar il persunal da segirezza.

Vegnan ins accumpagnà d’in lieu a l’auter durant la visita?

Il persunal da segirezza As mussa la via sin la tribuna ed il team dals Servetschs dal parlament vegn alura per Vus sin la tribuna ed As accumpogna tenor Voss program d’in lieu a l’auter.

Tge èsi da resguardar en connex cun la controlla da segirezza?

Tut las visitadras e tut ils visitaders vegnan suttamess ad ina controlla da segirezza cun agid d’in detectur da metal.

Ston tut las participantas e tut ils participants da la gruppa purtar cun sai ina carta d’identitad?

Tut las visitadras e tut ils visitaders a partir da 16 onns ston purtar cun sai in document d’identitad valaivel. Documents d’identitad valaivels èn: il passaport, la carta d’identitad (da la Svizra ubain da stadis da la UE), il permiss dad ir cun auto (da la Svizra ubain da stadis da la UE), il document da legitimaziun svizzer da persunas estras.

Vegnan er passaports da l’exteriur ubain ina permissiun da domicil C acceptads sco documents d’identitad?

Ils documents d’identitad uffizials valaivels èn: il passaport, la carta d’identitad (da la Svizra ubain da stadis da la UE), il permiss dad ir cun auto (da la Svizra ubain da stadis da la UE), il document da legitimaziun svizzer da persunas estras, pia er ina permissiun da domicil C.

Tge far, sch’il document d’identitad è scrudà ed il temp na tanscha betg pli per laschar far in nov?

Cartas d’identitad u passaports scrudads vegnan acceptads. Els na dastgan però betg esser scrudads avant dapli che sis mais.

Po in’ura da dumondas cun ina parlamentaria u in parlamentari e/u ina curta visita guidada en la halla a cupla vegnir reservada senza ina reservaziun existenta per ina visita sin la tribuna dal Cussegl naziunal?

Na, i n’è betg pussaivel da reservar in’ura da dumondas ubain ina curta visita guidada senza reservar ina visita sin la tribuna dal Cussegl naziunal.

Quant ditg dura la curta visita guidada en la halla a cupla?

La curta visita guidada en la halla a cupla dura maximalmain 30 minutas. Sche l’ura da dumondas precedenta sa retardescha, sto ella vegnir scursanida per motivs organisatorics. I vegn visità mo la halla a cupla.

Pon ins er desister da l’ura da dumondas cun ina parlamentaria u cun in parlamentari e prender part da la curta visita guidada en la halla a cupla directamain suenter la visita sin la tribuna?

L’ura da dumondas e la curta visita guidada èn opziunalas. Vus pudais desister d’omaduas purschidas ubain d’ina purschida u da l’autra. Selecziunai sin la plattafurma da reservaziun quai che Vus giavischais. Sche Vus desistis da l’ura da dumondas, ha lieu la curta visita guidada directamain lieu suenter la visita sin la tribuna.

Organiseschan ils Servetschs dal parlament la parlamentaria u il parlamentari per l’ura da dumondas?

Na, per l’ura da dumondas èn las visitadras ed ils visitaders sezs responsabels. Per far quai contactescha la persuna responsabla per la gruppa ina parlamentaria u in parlamentari ed inditgescha en sia fanestra da reservaziun il num respectiv fin il pli tard trais emnas avant il di da la visita, sur il link persunal retschavì en l’e-mail da conferma.

Co contacteschan ins ina parlamentaria u in parlamentari?

Las parlamentarias ed ils parlamentaris pudais Vus contactar per e-mail e nua ch’il numer è enconuschent er per telefon. Tut las infurmaziuns necessarias chattais Vus sin la pagina d’internet:

Per commembras e commembers dal Cussegl naziunal: https://www.parlament.ch/de/organe/nationalrat/mitglieder-nationalrat-a-z

Per commembras e commembers dal Cussegl dals chantuns: https://www.parlament.ch/de/organe/staenderat/mitglieder-staenderat-a-z

Èn las visitadras ed ils visitaders responsabels per la reservaziun d’ina stanza per l’ura da dumondas?

Na, la reservaziun d’ina stanza per l’ura da dumondas sco er l’infurmaziun da la parlamentaria cumpetenta u dal parlamentari cumpetent vegnan mintgamai surpigliadas dals Servetschs dal parlament. Las parlamentarias ed ils parlamentaris vegnan infurmads il pli tard il di dal discurs davart il lieu (numer da la stanza) e las uras. Contactar la parlamentaria u il parlamentari ston las gruppas però sezzas.

Vegnan las gruppas da visitadras e visitaders accumpagnadas en las stanzas da las cumissiuns correspundentas?

Ins vegn per las gruppas las uras fixadas temps fixads sin la tribuna e las accumpogna en la stanza correspundenta.

Èsi pussaivel da visitar er il Cussegl dals chantuns?

Sch’il Cussegl dals chantuns sa raduna e sch’i dat anc plazzas libras sin la tribuna, èsi pussaivel da visitar er las debattas en il Cussegl dals chantuns. Las plazzas na pon betg vegnir reservadas ordavant. Gruppas ch’han dumandà ina cussegliera u in cusseglier dals chantuns per l’ura da dumondas han la prioritad.

Ston ins sa decider tranter la visita dal Cussegl naziunal u dal Cussegl dals chantuns? U pon ins visitar omadus per circa ina mes’ura?

La reservaziun da la visita durant la sessiun vala per la tribuna en il Cussegl naziunal. Las visitadras ed ils visitaders pon passentar l’entira ura en il Cussegl naziunal. Sin dumonda pon las visitadras ed ils visitaders er visitar las debattas per ina mes’ura en il Cussegl dals chantuns. Quai n’è deplorablamain betg adina pussaivel, damai che las uras da la sesida en il Cussegl dals chantuns vegnan savens scursanidas ubain annulladas dal tuttafatg a curta vista. Plinavant è il dumber da plazzas limità. Perquai na datti nagina garanzia per in’eventuala visita en il Cussegl dals chantuns.

Pon ins er visitar la sala dals pass pers?

Na, entrar en la sala dals pass pers durant las sessiuns pon mo las parlamentarias ed ils parlamentaris sco er persunas cun ina permissiun d’access speziala.

È il restaurant en la Chasa federala avert per il public?

Il restaurant da la Chasa federala, il Grand Café Galerie des Alpes, n’è betg avert per il public. Reservaziuns per ina visita ston vegnir fatgas da las parlamentarias u dals parlamentaris.

Datti in lieu, nua ch’ins po far in picnic da trid’aura (in zic protegì)?

In lieu uffizial per far picnics na datti betg.

Datti installaziuns per persunas da flaivl’udida?

A persunas da flaivl’udida stattan a disposiziun uregliers. Quels funcziunan mo per apparats d’udida ch’èn equipads cun in buttun da func u da radio. Sin las tribunas pon ils uregliers vegnir utilisads per tadlar la translaziun simultana. Gruppas che dovran uregliers, èn obligadas da communitgar quai a chaschun da la reservaziun.

Vegnan las debattas translatadas en la lingua da segns?

Na, in na dat nagina translaziun en la lingua da segns.