Qua chattais Vus tut las infurmaziuns impurtantas en connex cun Vossa visita da l'edifizi dal parlament durant las sessiuns:

Custs

Vus pudais persequitar las debattas ed As participar gratuitamain a l'ura da dumondas cun in commember da las Chombras federalas ed a l'occurrenza d'infurmaziun en la halla a cupla.

Entrada per visitaders

L'entrada per visitaders è cuntanschibla via la Terrassa federala. Sin la terrassa arrivais Vus nà da la Plazza federala via las stgalas a dretga u a sanestra da la Chasa federala. Charrotschas d'uffants ston vegnir deponidas a l'entrada per visitaders.

Visita en sutga cun rodas

Visitadras e visitaders en sutga cun rodas utiliseschan p.pl. l'entrada nord a la Plazza federala.

Visita cun impediment da la vesida

Per visitadras e visitaders cun in impediment da la vesida stat a disposiziun ina descripziun curta da l'edifizi dal parlament en scrittira da Braille.

Controlla da segirezza

Resguardai p.pl. che tut las visitadras e tut ils visitaders a partir da 16 onns ston deponer tar la controlla da segirezza ina legitimaziun uffiziala e far ina controlla da segirezza a maun d'in detectur da metal.

Midadas da l'urden dal di a curta vista

Resguardai p.pl. ch'ils temps da sesida da las Chombras federalas previs pon vegnir scursanids a curta vista u che las sesidas pon vegnir stritgadas dal tut. Sut questas cundiziuns n'ha betg lieu la visita sin tribuna ed eventualmain era betg l'ura da dumondas cun il cussegl, quai che avess per consequenza che l'entira visita vegniss stritgada.

Fotografar e filmar

Fotografar e filmar giu da las tribunas è scumandà.

Uregliers / translaziun

Per pudair persequitar la translaziun simultana da las debattas As stattan a disposiziun gratuitamain uregliers.

Contact ed annunzia per visitas durant las sessiuns

Da nov è la reservaziun gratuita da Vossas plazzas da tribuna per visitas da gruppas pussaivla exclusivamain online. La colliaziun As maina directamain sin nossa pagina da reservaziun, nua che Vus chattais ils dis ed ils temps anc libers. Cun paucs clics pudais Vus reservar plazzas per las sessiuns gia dadas liber: selecziunar la sessiun giavischada, endatar la data ed il temp, metter en il chanaster da rauba il dumber da plazzas da tribuna (10-40) giavischà e terminar la reservaziun tenor las indicaziuns. La reservaziun cumpiglia la visita sin tribuna e sin dumonda in'ura da dumondas cun in commember da las Chombras federalas e/u in'occurrenza d'infurmaziun en la halla a cupla. Uschespert ch'ina reservaziun è terminada, survegnis Vus in e-mail da conferma cun tut las infurmaziuns necessarias.

Sche Vus avais dumondas en connex cun la nova reservaziun online u cun ina visita durant la sessiun, As drizzai p.pl. a la suandanta adressa: sessionsbesuche@parl.admin.ch