Ils 12 da settember 1848 è vegnida deliberada l'emprima Constituziun federala svizra. Cun quai è la Svizra daventada l'emprima democrazia en l'Europa.
Quest onn festivescha la Svizra il giubileum da 175 onns da quest eveniment istoric. Per quest motiv ha lieu ils 12 da settember 2023, a partir da las 17.30, ina festa populara sin la Plazza federala. La populaziun è envidada da participar a questa occurrenza, a la quala sa preschentan pliras artistas e plirs artists.
A las 18.48 vegn discuvert il nov timpanon da l'edifizi dal parlament. L'ovra che ornescha ussa l'edifizi, vegn preschentada al public en preschientscha dal pèr artistic Renée Levi e Marcel Schmid sco er dal Comité da patrunadi dal giubileum, che consista dal president dal Cussegl naziunal Martin Candinas, da la presidenta dal Cussegl dals chantuns Brigitte Häberli-Koller, da la cussegliera federala Elisabeth Baume-Schneider e dal president dal Tribunal federal Yves Donzallaz.
Swisskeramik, la manufactura da Sarnen che ha producì las plattas da cheramica per l'ovra «Tilo», vegn er ad esser al lieu per preschentar sia lavur.
L'Assamblea federala vegn a festivar l'eveniment istoric l'avantmezdi, a l'ur da la sessiun dal parlament, en preschientscha da l'entir Cussegl federal e dal president dal Tribunal federal. La sesida da l'avantmezdi è deditgada a la ceremonia uffiziala, a la quala èn envidadas er las represchentanzas da las regenzas chantunalas e las ambassaduras ed ils ambassadurs dals pajais vischins. A las parlamentarias ed als parlamentaris vegn mussada en quest connex er la Constituziun originala da l'onn 1848, che l'Archiv federal ha dà ad emprest per quest intent.
Quest anniversari porscha l'occasiun da festivar las valurs che han marcà ils ultims 175 onns la Svizra unida e democratica e da renovar l'engaschament per in avegnir prosperaivel ed armonic dal pajais. En onur da la Constituziun dal 1848 vegn organisada ina festa populara, a la quala la populaziun e las parlamentarias ed ils parlamentaris duain sa barattar e passentar ensemen uras da cumpagnia.