L'Assamblea parlamentara da la NATO (AP NATO) è in'organisaziun interparlamentara. Dapi l'onn 1955 porscha ella als parlaments dals stadis commembers la pussaivladad da sa scuntrar e da discutar davart problems da la segirezza e davart interess cuminaivels.

ORGANISAZIUN DA LA AP NATO

Oz èn represchentads en ella las legislativas da 31 stadis commembers da l'Allianza atlantica, dad 10 stadis associads e da 4 stadis da la Mar Mediterrana associads, observaturs dad ulteriurs 8 stadis sco er mintgamai ina delegaziun dal Parlament europeic, da l'Assamblea parlamentara da la OSCE e da l'Assamblea parlamentara dal Cussegl da l'Europa. La AP NATO ha 274 delegadas e delegads dals stadis commembers. Tut en tut cumpiglia l'Assamblea ca. 360 delegadas e delegads. Questas parlamentarias e parlamentaris èn per gronda part commembras e commembers da las cumissiuns da defensiun parlamentaras dals pajais respectivs. L'Assamblea porscha in rom ideal per in barat d'opiniuns e d'ideas davart temas da la politica da segirezza e permetta a las commembras ed als commembers da la delegaziun svizra, a chaschun da lur activitad en la AP NATO, d'entrar en contact cun lur collegas d'uffizi respectivs.

ROLLA E MANDAT DA LA DELEGAZIUN SVIZRA EN LA AP NATO

La delegaziun svizra profita da questas contacts per sa far in maletg da las posiziuns da las differentas delegaziuns. Uschia pon vegnir identifitgads ils puncts centrals da las discussiuns futuras davart la politica da segirezza. Grazia als rapports a bucca ed en scrit en la Cumissiun per la politica da segirezza garantescha la delegaziun che las enconuschientschas ed ils contacts da sias activitads da viadi vegnian resguardads er en las debattas naziunalas svizras.

Per la delegaziun svizra èn la dieta da primavaira e la dieta annuala las occurrenzas las pli impurtantas da la AP NATO. A questas duas radunanzas plenaras preschentan ils tschintg comités lur lavur e la AP NATO deliberescha recumandaziuns strategicas (uschenumnadas resoluziuns) che vegnan suttamessas al Cussegl da l'Atlantic dal Nord e/u a las regenzas dals stadis commembers.

Ultra da quai èn en spezial ils «Seminaris Rose Roth» d'in interess spezial per la Svizra. Tar questas scuntradas che han lieu duas fin trais giadas per onn duain en spezial las parlamentarias ed ils parlamentaris da stadis neutrals e da stadis betg commembers da la NATO pudair sa participar a las lavurs da l'Assamblea parlamentara.

 La Svizra sco commembra associada ha 5 sezs. La delegaziun cumpiglia ils presidis da las Cumissiuns per la politica da segirezza (CPS) da tuttas duas chombras. Sco commembras substitutas e commembers substituts vegnan per regla designads las anteriuras presidentas ed ils anteriurs presidents da la CPS.

Actualmain vegn la delegaziun manada da la cussegliera naziunala Priska Seiler Graf (ZH). La cussegliera dals chantuns Andrea Gmür-Schönenberger (LU) è la presidenta substitut da la delegaziun.

La delegaziun ha sia basa giuridica en l'Ordinaziun da l'Assamblea federala davart las relaziuns internaziunalas dal parlament (ORInt) dals 28 da settember 2012 (CS 171.117).