LAS DELEGAZIUNS PER RELAZIUNS CUN PARLAMENTS D'AUTERS STADIS

La Svizra tgira stretgas relaziuns bilateralas cun ils pajais vischins. Igl exista in viv barat politic, social ed economic cun l'Austria, la Frantscha, la Germania, l'Italia ed il Principadi da Liechtenstein. Quai vala cunzunt er per las regiuns da cunfin. Questas fermas colliaziuns premettan lura er ina stretga coordinaziun entaifer ed ordaifer il cunfin naziunal. Per sustegnair las relaziuns bilateralas impurtantas cun ils pajais vischins da vart dal parlament tgiran tschintg delegaziuns permanentas da l'Assamblea federala mintgamai il contact cun il Bundestag tudestg, cun ils parlaments da la Frantscha, da l'Italia e da l'Austria sco er cun il Landtag dal Principadi da Liechtenstein. Las activitads da las singulas delegaziuns varieschan tut tenor las prioritads che vegnan fixadas dal presidi, tut tenor las sfidas actualas e tut tenor la situaziun politica en il pajais vischin. Il mandat da las delegaziuns sa basa sin l'art. 4 e l'art. 8 da l'Ordinaziun da l'Assamblea federala dals 28 da settember 2012 davart las relaziuns internaziunalas dal parlament (ORInt; CS 171.117) (versiun dals 2 da december 2019).

Las tschintg delegaziuns suttamettan a las Chombras federalas almain ina giada per perioda da legislatura in rapport en scrit davart lur activitad (guardar art. 9 ORInt). Per pudair garantir la coerenza da las stentas parlamentaras en la politica exteriura ha lieu almain ina giada per onn ina conferenza da coordinaziun cun tut las presidentas ed ils presidents da las delegaziuns e cun ils presidis da las Cumissiuns per la politica exteriura.

Las delegaziuns per las relaziuns cun ils parlaments dals stadis vischins na dastgan betg vegnir confundidas cun las gruppas d'amicizia parlamentaras che tgiran il contact cun auters pajais resp. gruppas da pajais u regiuns. Questas gruppas d'amicizia n'èn betg organs uffizials, na vegnan betg finanziadas da l'Assamblea federala e survegnan mo in sustegn administrativ limità. Las gruppas d'amicizia parlamentaras na pon perquai er betg sa preschentar en num da l'Assamblea federala (guardar art. 63 da la Lescha federala davart l'Assamblea federala [Lescha dal parlament, LParl; CS 171.10]).