Qua chattais Vus tut las infurmaziuns impurtantas en connex cun Vossa visita da la Chasa federala durant las sessiuns.
Custs
Vus pudais persequitar las debattas ed As participar gratuitamain a l'ura da dumondas cun in commember da las Chombras federalas ed a l'occurrenza d'infurmaziun en la halla a cupla.
Entrada per visitaders
L'entrada per visitaders è cuntanschibla via la Terrassa federala. Sin la terrassa arrivais Vus nà da la Plazza federala via las stgalas a dretga u a sanestra da la Chasa federala. Charrotschas d'uffants ston vegnir deponidas a l'entrada per visitaders.
Visita en sutga cun rodas
Visitadras e visitaders en sutga cun rodas utiliseschan p.pl. l'entrada nord a la Plazza federala.
Visita cun impediment da la vesida
Per visitadras e visitaders cun in impediment da la vesida stat a disposiziun ina descripziun curta da la Chasa federala en scrittira da Braille.
Controlla da segirezza
Las persunas da 16 onns u dapli sco er uffants e giuvenils sut 16 onns che na vegnan betg accumpagnads da persunas creschidas, vegnan suttamess ad ina controlla d'identitad e ston preschentar in document d'identitad uffizial al persunal da segirezza. Sco documents d'identitad uffizials valaivels cun fotografia valan: passaport, carta d'identitad (da la Svizra e da pajais da la UE), permiss da manischar (da la Svizra e dals pajais da la UE), legitimaziun svizra da persunas estras, carta da legitimaziun dal DFAE, carta da legitimaziun da la Confederaziun. Lura suonda la controlla tecnica da segirezza cun agid d'in detectur da metal per persunas e d'ina radiografia per chaussas prendidas cun sai.
Midadas da l'urden dal di a curta vista
Resguardai p.pl. ch'ils temps da sesida da las Chombras federalas previs pon vegnir scursanids a curta vista u che las sesidas pon vegnir stritgadas dal tut. Sut questas cundiziuns n'ha betg lieu la visita sin tribuna ed eventualmain era betg l'ura da dumondas cun il cussegl, quai che avess per consequenza che l'entira visita vegniss stritgada.
Fotografar e filmar
Fotografar e filmar giu da las tribunas è scumandà.
Uregliers / translaziun
Per pudair persequitar la translaziun simultana da las debattas As stattan a disposiziun gratuitamain uregliers.