Il Cussegl dals chantuns sa cumpona da 46 represchentantas u represchentants dals chantuns svizzers. Mintga chantun elegia duas represchentantas u dus represchentants, ils chantuns AI, AR, BL, BS, NW ed OW ina represchentanta u in represchentant.

Il Cussegl dals chantuns vegn elegì tenor il dretg chantunal. 45 da totalmain 46 commembras e commembers vegnan elegids a l'urna, q.v.d. tras scrutini, a medem temp sco il Cussegl naziunal. En l'Appenzell Dadens elegia la Landsgemeinde (radunanza da tut las votantas ed ils votants) la represchentanza dal chantun mintgamai l'avrigl avant las elecziuns dal Cussegl naziunal. En ils chantuns Giura e Neuchâtel vegn applitgada la procedura da proporz, en ils auters chantuns la procedura da maiorz.
En tut ils chantuns pon vegnir elegids mo Svizras e Svizzers che han cumplenì 18 onns. La constituziun chantunala da Glaruna fixescha ina limita da vegliadetgna: Sias represchentantas e ses represchentants dal chantun vegnan exclus da l'uffizi, sch'ellas ed els cumpleneschan 65 onns per la proxima Landsgemeinde resp. per la fin da zercladur. Il chantun Giura percunter enconuscha ina limitaziun dal temp d'uffizi: Las commembras ed ils commembers dal Cussegl dals chantuns che represchentan il Giura, pon vegnir elegids mo duas giadas ina suenter l'autra.

Las commembras ed ils commembers dal Cussegl dals chantuns vegnan elegids oz en tut ils chantuns per ina perioda d'uffizi da 4 onns.

Elecziuns dal Cussegl dals chantuns 2019