Il 1. d'avust daventa l'edifizi dal parlament in lieu d'inscunter. Da las 08.30 fin las 16.30 ha la populaziun la pussaivladad da visitar las stanzas impressiunantas dal Cussegl naziunal e dal Cussegl dals chantuns, la halla a cupla e la halla dals pass pers sco er la stanza da sesidas dal Cussegl federal e la biblioteca dal parlament en la Chasa federala vest. L'entrada è gratuita.
In punct culminant dal di èn ils discurs cun ils presidis da las chombras: A las 12.00 dat il president dal Cussegl dals chantuns Andrea Caroni ina invista dal manaschi parlamentar en il «Stöckli». A las 13.00 stattan la presidenta dal Cussegl naziunal Maja Riniker ed il president dal Cussegl dals chantuns Andrea Caroni a disposiziun en la sala dal Cussegl naziunal per las dumondas da las visitadras e dals visitaders. Quests discurs vegnan translatads simultanamain en franzos ed en talian.
Plinavant As spetgan visitas guidadas infurmativas davart l'edifizi dal parlament e davart il manaschi parlamentar en differentas linguas sco er represchentaziuns musicalas da Trionettli e d'ina furmaziun appenzellaisa or dals chantuns d'origin dals presidis da las chombras.
En la halla a cupla preschenta l'exposiziun «25 onns Constituziun federala actuala» l'istorgia da quest document impurtant. Per spaisas e bavrondas procura il café Zeitungszimmer, e per ils uffants datti in program spezial cun concurrenzas, tattoos e buttons. Ultra da quai dat la Chasa federala vest ina invista da la stanza da sesidas dal Cussegl federal. Il gir auditiv permetta da scuvrir en moda autonoma l'edifizi ed ils conturns.
Nus ans legrain sin Vossa visita e sin ina festa naziunala nunemblidaivla en il cor da la democrazia svizra!