La Delegaziun a l'Assamblea parlamentara da l'OSCE (AP OSCE) è in forum per il dialog e per la collavuraziun interdepartamentala che s'occupa dals suandants temas: segirezza (prevenziun da conflicts e controlla da l'armament), sustegn dal svilup economic e da l'utilisaziun persistenta da las resursas natiralas sco er promoziun da l'observaziun dals dretgs umans e da las libertads fundamentalas. L'Assamblea reunescha passa 320 parlamentarias e parlamentaris da 57 pajais da l'Europa, da l'Asia e da l'America dal Nord.

La AP OSCE è vegnida fundada l'onn 1991 dals parsuras da l'Organisaziun per la segirezza e la collavuraziun en l'Europa (OSCE) che aveva da quel temp anc num Conferenza davart la segirezza e la cooperaziun en l'Europa (CSCE). Sia activitad sa basa sin l'Acta finala da Helsinki da l'onn 1975 e correspunda a la Charta da Paris per ina nova Europa da l'onn 1990.

Finamiras da la AP OSCE

L'Assamblea parlamentara persequitescha pliras finamiras:

  • evaluar la realisaziun da las finamiras da la OSCE;
  • discutar davart temas dal Cussegl dals ministers da la OSCE e da las scuntradas da las presidentas e dals presidents dals stadis e da las regenzas;
  • sviluppar e promover mecanissems per prevegnir a conflicts e per terminar conflicts;
  • far sforzs per rinforzar e per consolidar las instituziuns democraticas en ils stadis da la OSCE;
  • garantir che las elecziuns en ils stadis da la OSCE vegnian fatgas tenor princips democratics;
  • contribuir al svilup da las structuras instituziunalas da la OSCE e promover las relaziuns tranter las instituziuns existentas da la OSCE.

Per cuntanscher questas finamiras deliberescha l'Assamblea en sia dieta il fanadur mintgamai ina decleranza finala ch'ella drizza al Cussegl dals ministers da la OSCE ed als parlaments dals stadis commembers. Questa decleranza cumpiglia las resoluziuns che vegnan elavuradas da las rapportadras e dals rapportaders da las delegaziuns sco er da las commembras e dals commembers da la AP OSCE. Las delegaziuns tractan er temas d'actualitad internaziunala. Ultra da quai èn vegnids lantschads differents programs per sviluppar e per rinforzar la democrazia. Uschia trametta l'Assamblea regularmain observadras ed observaders electorals en pajais, en ils quals han lieu elecziuns, e deleghescha missiuns spezialas en territoris cun crisas cuantas u avertas.

Moda da lavurar da la AP OSCE

La AP OSCE sa raduna mintgamai il cumenzament da fanadur a sia radunanza plenara en in da ses stadis commembers. Ultra da quai salva ella mintga onn ina dieta d'enviern e d'atun. La lavur da l'Assamblea vegn preparada en trais comités che correspundan a las trais dimensiuns da l'Acta finala da Helsinki (segirezza, promoziun da la collavuraziun tranter ils stadis, dretgs umans):

L'Assamblea ha plirs comités ad hoc. Quels tractan temas che meritan in'attenziun speziala dals parlaments, sco migraziun, cumbat cunter il terrorissem u l'agen manaschi instituziunal.

Las incumbensadas spezialas ed ils incumbensads spezials servan sco persunas da contact en cas da problems regiunals ed actuals. Ellas ed els coordineschan las lavurs da l'Assamblea e garanteschan che quella ageschia en moda adequata en las fatschentas correspundentas. I vegnan resguardads pliras regiuns e plirs temas. Uschia datti tranter auter incumbensadas spezialas ed incumbensads spezials per il territori da la Mar mediterrana, per l'Europa dal Sidost, per dumondas d'egualitad sco er per il cumbat dal commerzi cun umans, da l'antisemitissem e da la corrupziun.

Incumbensa da la delegaziun da la AP OSCE

La delegaziun svizra represchenta ils interess naziunals en il rom da las tractativas da la AP OSCE. Ella è l'autura da numerusas resoluziuns ch'èn vegnidas deliberadas da l'Assamblea parlamentara e che prevesan il mantegniment dals dretgs umans, ils aspects politics militars da la segirezza u la Good Governance. Per ademplir cun success questas incumbensas tgira ella stretgs contacts cun las represchentantas ed ils represchentants da l'Administraziun federala. Ultra da quai sa baratta ella regularmain cun las autras delegaziuns da la AP OSCE e cun las instanzas supremas da la OSCE. Plinavant sa participeschan las commembras ed ils commembers da la delegaziun a las missiuns d'observaziun da las elecziuns che vegnan manadas tras dal Biro da la OSCE per instituziuns democraticas e dretgs umans (BIDDH) (Office for Democratic Institutions and Human Rights, ODIHR).