Las presidentas ed ils presidents da las Chombras federalas giogan ina rolla centrala en las relaziuns interparlamentaras ed internaziunalas da la Svizra, er sche lur uffizi dura mo 1 onn. A Berna beneventan ellas ed els delegaziuns da l'exteriur u represchentantas e represchentants da regenzas estras che fan ina visita uffiziala a la Svizra. Il parlament svizzer retschaiva mintga onn en media sis fin otg delegaziuns da l'exteriur che vegnan manadas da la presidenta u dal president d'in parlament. A l'exteriur fan las presidentas ed ils presidents da las Chombras federalas – mintgatant accumpagnads da delegaziuns parlamentaras – visitas uffizialas a lur collegas d'uffizi e sa participeschan a conferenzas interparlamentaras europeicas u internaziunalas. Grazia a quests viadis pon las presidentas ed ils presidents da las Chombras federalas approfundar lur enconuschientschas davart la situaziun politica, sociala ed economica dal pajais visità e s'infurmar davart temas internaziunals e regiunals actuals sco er davart las activitads da la Svizra en quest pajais.