Ils Servetschs dal parlament mettan a disposiziun a la publicitad fotografias e videos dal parlament svizzer, en spezial da ses organs, sias commembras e ses commembers, sias activitads e sias occurrenzas.
1. Intents d'utilisaziun
Las fotografias ed ils videos mess a disposiziun pon vegnir chargiads giu e duvrads gratuitamain per intents d'infurmaziun, da documentaziun, d'instrucziun, da perscrutaziun e d'instrucziun civica u per rapports da medias.
Permessas èn surtut las suandantas utilisaziuns:
- la publicaziun en las medias stampadas u online;
- la derasaziun en il radio, en la televisiun u en producziuns audiovisualas;
- l'utilisaziun en publicaziuns instituziunalas u infurmativas.
Per intents commerzials sco er per intents da reclama, da promoziun u da marketing è l'utilisaziun scumandada, nun ch'ils Servetschs dal parlament hajan dà ordavant lur consentiment scrit.
2. Dretgs d'autur e midadas
Ils dretgs d'autur ed ils auters dretgs vi da las fotografias ed ils videos mess a disposiziun han ils Servetschs dal parlament u las possessuras ed ils possessurs dals dretgs ch'èn menziunads explicitamain.
Cun metter a disposiziun u cun chargiar giu las fotografias ed ils videos na vegnan transferids nagins dretgs d'autur vi da quests cuntegns u auters dretgs da proprietad intellectuala.
Las adattaziuns tecnicas ch'èn necessarias per la publicaziun, sco il tagl, la cumpressiun e la reducziun dal format u pitschnas correcturas da la colur u da la glisch, èn permessas, sch'ellas na midan ni il cuntegn, ni il context, ni la muntada da la fotografia u dal video.
Tut las autras midadas èn scumandadas, nun ch'ils Servetschs dal parlament hajan dà ordavant lur consentiment scrit. Quai vala surtut per:
- far montaschas da fotografias u da videos;
- agiuntar elements grafics u elements da text che pon midar la muntada dal maletg;
- midar u stizzar elements sin la fotografia u en il video;
- tut las utilisaziuns engianusas ubain ordaifer il context.
3. Responsabladad
Tgi che publitgescha u derasa ina fotografia u in video, surpiglia la plaina responsabladad per quai.
Ils Servetschs dal parlament na garanteschan ni la correctadad, ni la cumplettezza, ni l'actualitad dals cuntegns mess a disposiziun e refusan la responsabladad per donns materials u immaterials che resultan cun far diever u betg far diever da quests cuntegns.
Ils Servetschs dal parlament resalvan il dretg da midar, cumplettar u stizzar da tut temp e senza preavis ils cuntegns mess a disposiziun.
4. Indicaziun da las funtaunas
Sch'ina fotografia u in video vegn utilisà, sto la funtauna vegnir inditgada en moda bain visibla e sco suonda:
«© ParlCH / num da la fotografa u dal fotograf»
Sch'il num da la fotografa u dal fotograf n'è betg inditgà en la banca da datas u en las infurmaziuns cumplettantas, è la suandanta remartga suffizienta:
«© ParlCH»
Quai vala er per publicaziuns online e per las raits socialas.
5. Dretg applitgabel e dretgira cumpetenta
I vala il dretg svizzer.
La dretgira cumpetenta exclusiva è Berna.