​L'edifizi dal parlament, enconuschent en general sco «Chasa federala», è vegnì construì ils onns 1894 fin 1902 tenor ils plans da l'architect Hans Wilhelm Auer. Il 1. d'avrigl 1902 è el vegnì inaugurà festivamain tras l'Assamblea federala plenara.

L'edifizi dal parlament emplenescha per uschè dir sco crap final il spazi tranter la Chasa federala vest (construida 1852–1857) e la Chasa federala ost (construida 1888–1892). El furma pia l'etappa finala da questa seria d'edifizis ed è il punct architectonic culminant dal project «Palaz federal». 95 pertschient dals materials duvrads derivan da la Svizra. Els èn ina represchentaziun simbolica da la Svizra e mussan la diversitad culturala e materiala dal pajais e da sia populaziun.

Ils onns 2006 fin 2008 è l'edifizi dal parlament vegnì suttamess per l'emprima giada en sia istorgia da passa 100 onns ad ina renovaziun cumplessiva, nua ch'i èn er vegnidas fatgas midadas considerablas vi da la construcziun.

 

Infurmaziuns davart la concepziun artistica

Halla da la cupla

En la halla centrala da la cupla tranter las duas salas da las chombras sa chattan numerusas preschentaziuns simbolicas davart l'istorgia svizra e davart il stadi federal svizzer.

La cupla da vaider mussa las vopnas dals chantuns, posiziunadas en moda radiala enturn la crusch svizra. La multiplicitad simbolisada tras ils chantuns stat en ina relaziun reciproca cun l'unitad da la Confederaziun e precisescha la parola «In per tuts, tuts per in» ch'enramescha la bandiera svizra. La vopna dal chantun Giura è plazzada daspera, cun l'onn da la fundaziun (1978) dal nov chantun. Las quatter grondas fanestras artgadas cun scenas da la vita professiunala dal pievel represchentan las quatter regiuns dal pajais e mussan lur products economics principals.

Ils medagliuns da la cupla èn l'ovra dad Antonio Soldini, in anteriur cusseglier naziunal. Els simboliseschan il militar, l'educaziun, la giustia e la construcziun.

 

Ils medagliuns da la cupla 

 

James A. Vibert ha creà il monument dals Trais Confederads che han fatg l'engirament dal Patg federal sin il Rütli (Werner Stauffacher, Walter Fürst ed Arnold da Melchtal).

 

Ils Trais Confederads 
Quatter mercenaris èn postads tar las stgalas; els represchentan las quatter linguas naziunalas.

Visavi la gruppa dal Rütli sa chatta in reliev davart la derivanza dals Svizzers. El suonda la legenda davart l'arrivada dals perdavants, sco ch'i vegn raquintà da Schiller en sia ovra «Guglielm Tell».

 

Ils quatter mercenaris 

 Il reliev davart la derivanza dals Svizzers

 

En las nischas sut il reliev stattan a sanestra Arnold Winkelried sco simbol per la prontezza da sa sacrifitgar ed a dretga Clau da Flia sco simbol per la concilianza.

 

Winkelried e von der Flüe 

 

Sala dal Cussegl naziunal

La sala dal Cussegl naziunal vegn ornada d'in maletg da paraid da Charles Giron ch'è 5 meters aut e 12 meters lad; davantvart enconuschan ins il prà dal Rütli – la «tgina da la Confederaziun» – e davosvart ils dus Mythens.

En las duas nischas a dretga ed a sanestra dal maletg da paraid sesan duas figuras che represchentan la dunna da Stauffacher e Guglielm Tell.

En il champ da la culmaina sur il maletg da Giron è represchentada la «legenda», la figura d'ina dunna che raquinta da las grondas ovras dals perdavants ad ina partida uffants che taidlan cun attenziun.

Ordinadas tenor chantuns orneschan las vopnas da 59 vischnancas svizras ina curnisch che s'extenda enturn ed enturn la sala.

 

Sala dal Cussegl naziunal 

 

L'onn 1993 è la sala dal Cussegl naziunal vegnida suttamessa per l'emprima giada dapi sia inauguraziun ad ina renovaziun cumplessiva.

 

Sala dal Cussegl dals chantuns

La sala dal Cussegl dals chantuns, ch'è situada sur l'entrada principala vers la Plazza federala, vegn sclerida tras trais autas fanestras artgadas.

Ins entra en la sala tras las arcadas da las varts lateralas, sur las qualas sa chattan las tribunas dals aspectaturs.

Tras las arcadas picturadas da la vart davos da la sala (vers la halla da la cupla) vesan ins il cumin da Sutsilvania che vala sco in dals prototips da la lavur parlamentara svizra. Quest fresco è vegnì concepì dad Albert Welti e da ses collega pictur Wilhelm Balmer.

En las arcadas èn montadas tavlas cun annadas. Quellas regordan a datas impurtantas da l'istorgia constituziunala svizra.

 

Sala dal Cussegl dals chantuns