Servetschs da la CPA

  • Per incumbensa da las cumissiuns da gestiun (CdG) dal Cussegl naziunal e dal Cussegl dals chantuns evaluescha la CPA la legitimitad, l'opportunitad ed efficacitad da las activitads da las autoritads federalas.
  • La CPA fa attenta la CdG a temas che dovran ulteriur scleriment tenor l'opiniun da la surveglianza suprema parlamentara.
  • La CPA examinescha per incumbensa da la CdG la qualitad d'evaluaziuns, per las qualas l'administraziun federala ha sezza procurà sco era lur applicaziun en process da decisiun.
  • La CPA sclerescha per la CdG dumondas specificas en il rom da curtas incumbensas e la sustegna en connex cun controllas posteriuras da retschertgas precedentas.
  • La CPA po evaluar sin proposta d'autras cumissiuns parlamentaras l'efficacitad da mesiras da la Confederaziun.

 

 

Basas legalas e context instituziunal da la CPA

​Per rinforzar la surveglianza suprema dal parlament ha l'Assamblea federala decis il 1990 dad installar cun la CAP in servetsch professiunal che planisescha ed exequescha evaluaziuns per incumbensa da las cumissiuns parlamentaras. La CAP è per gronda part activa per incumbensa da la Cumissiun da gestiun (CdG) e dispona da vasts dretgs d'infurmaziun (artitgel 10 da l'Ordinaziun davart l'administraziun dal parlament en connex cun ils artitgels 67, 153 e 156 da la Lescha federala davart il parlament):

  • La CAP communitgescha cun tut las autoritads federalas, cun tut ils uffizis e tut ils ulteriurs purtaders dad incumbensas federalas directamain e po pretender da quels informaziuns e documents.
  • L'obligaziun dad infurmar da las autoritads na vegn betg limitada dal secret d'uffizi.
  • La CAP po incumbensar experts externs e surdar ad els ils medems dretgs d'infurmaziun.

 

La CAP fa part dals servetschs parlamentars ed è suttamessa administrativamain al secretariat da la CdG. La CAP elavura independentamain sias incumbensas. Ella lavura exclusivamain per incumbensa da cumissiuns parlamentaras.

La CAP s'orientescha tenor ils standards d'evaluaziun da la Societad svizra d'evaluaziun (SEVAL) e tenor la perscrutaziun scientifica relevanta en ils secturs tematics da las evaluaziuns. Ella coordinescha sias activitads cun auters organs da controlla da la Confederaziun e tgira il barat professiunal cun scolas autas, instituts da perscrutaziun privats ed organs d'evaluaziun statals.