​

Survista

• Dal 1848 fin ils onns 1920: il chancelier federal ha la funcziun da secretari dal Cussegl naziunal.
• Dal 1848 fin il 1980: il vicechancelier ha la funcziun da secretari dal Cussegl dals chantuns.
• Dals onns 1920 fin il 1934: ils protocols dal Cussegl naziunal vegnan redigids da dus «simpels» secretaris u translaturs.
• Dal 1934 fin il 1968: il chancelier federal ha puspè la funcziun da secretari dal Cussegl naziunal.
• Dal 1969 fin il 2007: ils protocols dal Cussegl naziunal vegnan redigids da dus «simpels» secretaris u translaturs.
• Dapi il 1981: in commember dal Secretariat general dals Servetschs dal parlament è secretari dal Cussegl dals chantuns.
• Dapi il 2008: in commember dal Secretariat general dals Servetschs dal parlament è secretari dal Cussegl naziunal.

Tar la fundaziun dal stadi federal svizzer l’onn 1848 eri vegnì decidì, ch’il chancelier federal ha er la funcziun da secretari dal Cussegl naziunal ed il vicechancelier quella da secretari dal Cussegl dals chantuns.

Ils onns 1920 è vegnì approvà in reglament che ha reglà en moda detagliada las incumbensas da la Chanzlia federala. En quel è vegnida francada da nov la funcziun dal «secretari per il servetsch da las Chombras federalas» (cun incumbensas tecnicas ed organisatoricas sco la circulaziun da las actas tranter las duas chombras). Durant las debattas davart quest reglament èsi er vegnì decidì, ch’il chancelier participescha, sche pussaivel, vinavant a las sesidas dal Cussegl naziunal, ma ch’el na duai betg pli far il protocol. Questa incumbensa è vegnida surdada a dus secretaris resp. ad in secretari ed ad in translatur[1]. Dapi lura era il chancelier mo anc responsabel per las relaziuns tranter il Parlament ed il Cussegl federal. Tras quai è sa reducì il stretg contact cun il Cussegl naziunal e la posiziun pussanta dal chancelier. Il Cussegl dals chantuns percunter vuleva, ch’il vicechancelier mantegnia sia funcziun da protocollist resp. da secretari.

La decisiun dals onns 1920 da surdar la protocollaziun da las sesidas dal Cussegl naziunal a dus secretaris n’ha betg chattà il consentiment da tuts. L’onn 1934 è quest servetsch vegnì reducì, perquai che George Bovet, ch’era gist vegnì elegì sco nov chancelier federal, ha mantegnì la funcziun da secretari dal Cussegl naziunal er suenter sia elecziun. Il chancelier ha fatg protocol en il Cussegl naziunal fin l’onn 1967/68 (cura ch’il chancelier federal Karl Huber ha desistì da questa funcziun) ed il vicechancelier ha fatg quai fin l’onn 1980 en il Cussegl dals chantuns (cura ch’il vicechancelier François Couchepin ha desistì da questa funcziun).

L’onn 1962 ha lura la revisiun da la Lescha davart las relaziuns tranter las Chombras federalas ed il Cussegl federal procurà per dapli independenza tranter ils Servetschs dal parlament e la Chanzlia federala: il secretari general da l’Assamblea federala è vegnì suttamess als presidents da las duas chombras. L’onn 1972 èn ils Servetschs dal parlament vegnids separads definitivamain da la Chanzlia sin plaun funcziunal. Dal punct da vista administrativ eran els però anc adina suttamess a la Chanzlia. Cun la revisiun totala da la Constituziun (Cst.) l’onn 1999 è lura er la part administrativa dals Servetschs dal parlament vegnida separada da la Chanzlia federala (art. 155 e 179 Cst.).

Ils onns 1969 fin 2007 consistiva l’incumbensa dals secretaris dal Cussegl naziunal lura puspè mo en la protocollaziun. Dapi l’onn 2008 na vegnan ils secretaris dal Cussegl naziunal betg pli numnads protocollists, mabain secretaris.

[1] En la glista qua survart è menziunà mo l’emprim dals dus nums che stattan en l’Annuari federal.