Sonda, ils 2 da matg 2026, da las 9.00 fin las 17.00, access sur l’entrada principala e sur l’entrada da visitas fin las 16.00 (sche necessari vegn la colonna da spetga schliada). Entrada libra.
Las persunas da 16 onns u dapli sco er uffants e giuvenils sut 16 onns che na vegnan betg accumpagnads da persunas creschidas, vegnan suttamess ad ina controlla d'identitad e ston preschentar in document d'identitad uffizial al persunal da segirezza.
En cas da grondas fullas ston ins quintar cun temps da spetga tar la controlla da segirezza.
Puncts culminants dal program
Show en la sala dal Cussegl dals chantuns
In actur da pantomima fa rir e restar cun bucc’averta il public: poetic, plain fantasia e surpraisas.
Represchentaziuns mintgamai a las 10.00, 12.00, 14.00, 15.30
Ils uffants dumondan – il president respunda
Il president dal Cussegl naziunal Pierre-André Page respunda a las dumondas dals uffants. Sajas curaschus!
En la sala dal Cussegl naziunal a las 13.00
Gea, na, abstenziun! – Co nascha ina lescha?
En ina lingua chapaivla per uffants decleran nossas guidas e noss guids, tge ch'èn las incumbensas dal parlament, ed els simuleschan ina votaziun.
En la sala dal Cussegl naziunal a las 11.00 ed a las 14.30
Visitar libramain l'edifizi dal parlament
Scuvri independentamain la sala dals pass pers, la halla a cupla, la sala dal Cussegl naziunal e la sala dal Cussegl dals chantuns. Nossas guidas e noss guids As infurmeschan gugent davart l'istorgia e davart l'architectura da l'edifizi.
Bar da sirup en il Café Vallotton
Ils uffants survegnan in sirup gratuit a la bar da l'anteriura stanza da gasettas.
Questas ed
autras attracziuns spetgan Vus ed ils uffants en l’edifizi dal parlament. Vegni sperasvi – nus ans legrain da numerusas visitadras e visitaders e da bleras fatschas d’uffants traglischantas!
Adatg! Per il di da las portas avertas ils 2 da matg 2026 tschertgain nus puspè
reportras u reporters d’uffants mirveglius (12 – 16 onns) da tut las regiuns linguisticas.
Tia incumbensa:
- Fa intervistas, videos u fotos durant il di dals uffants – cun visitadras, collavuraturas e collavuraturs u cun il president dal Cussegl naziunal: areguard tia creativitad na datti nagins cunfins!
- Tias contribuziuns cumparan sin ils
chanals da social media dal Parlament svizzer. Nus ta sustegnain tar quai.
Uschia t’annunzias ti:
Ans trametta fin ils 11 d’avrigl 2026 in curt video (max. 15 MB) a
junior@parl.admin.ch u al numer da telefonin
079 354 13 88 ed ans raquinta, pertge che ti vuls esser da la partida!
Tes premi:
- In di captivant sco reportra u reporter en la Chasa federala
- In pitschen regal per t’engraziar
- In sguard davos las culissas da la politica!
Guid audiovisual, Chasa federala: Installai l’app gratuita sin Voss smartphone ed As rendai sin in audiogir tras l’edifizi dal parlament.
Apple ed Android
Maletg: Monika Flückiger/Servetschs dal parlament
INFURMAZIUNS
Christoph Stutz
Responsabel per la furmaziun politica
Servetschs dal parlament, CH-3003 Berna
Tel.: +41 58 322 91 73
Christoph.stutz@parl.admin.ch
Valeria Bürdel
Guida dal parlament
Servetschs dal parlament, CH-3003 Berna
Tel.: +41 58 322 90 22
Valeria.buerdel@parl.admin.ch