Il di da las portas avertas pon las burgaisas ed ils burgais visitar l’edifizi dal parlament libramain ed en l’agen tempo. Entrar pon ins da las 08.30 fin las 15.30, las portas vegnan serradas a las 16.30. Las guidas ed ils guids dal parlament raquintan a tschertas uras istorgias davart l’edifizi. Las duas salas dals cussegls, la sala dals pass pers, la halla a cupla sco er l’exposiziun «Destins en mains» da l’organisaziun nunguvernamentala Helvetas èn medemamain accessiblas libramain. La stanza da sesidas dal Cussegl federal en l’ala vest da la Chasa federala è averta per la visita.
La discussiun al podium ha lieu da las 10.00 fin las 11.00 en la sala dal Cussegl naziunal. Il president dal Cussegl naziunal Dominique de Buman e la presidenta dal Cussegl dals chantuns Karin Keller-Sutter respundan a las dumondas dal public. Per surpraisas musicalas e teatralas procuran «Le Choeur de la Confrérie du Gruyère», «Martin.O» e Matthieu Rotzetter.
En la sala da cumissiuns 286 vegn mussà il film «Zimmer 286». El permetta da dar in sguard davos la porta serrada e mussa co che las commembras ed ils commembers da las Chombras federalas preparan ils projects per la debatta en ils cussegls. Il café «Zeitungszimmer» è avert.
Infurmaziun a las medias:
Collavuraturas e collavuraturs da medias senza legitimaziun pon s’accreditar qua https://www.parlament.ch/rm/services/accreditaziun-da-las-medias. Els pon entrar en l’edifizi dal parlament a l’entrada nord tras la porta sanestra.