Ils 19 da favrer, curt avant la sessiun da primavaira, va la nova pagina-web dal parlament online. La sanaziun totala che ha durà dus onns è stada necessaria pervia da las spetgas adina pli grondas dals utilisaders e pervia dal svilup tecnologic rasant. «La pagina-web
parlament.ch è la vitrina da l'Assamblea federala», di Mark Stucki, manader dal sectur infurmaziun dals Servetschs dal parlament. Qua rendia il parlament quint davart sia lavur e qua chattian las burgaisas ed ils burgais tut quai ch'il Cussegl naziunal ed il Cussegl dals chantuns discuteschan e decidan.
La concepziun e realisaziun da la nova pagina-web, inclus l'integraziun cumplexa da las differentas bancas da datas, è vegnida surdada il 2014 suenter ina concurrenza da l'Organisaziun mundiala da commerzi OMC/WTO. Ils custs totals dal project muntan a stgars 2,7 milliuns francs.
In diever pli simpel, ina tschertga precisa
La nova pagina-web permetta a las utilisadras ed als utilisaders da s'orientar meglier en la gronda quantitad d'infurmaziuns sin parlament.ch. La nova pagina-web è moderna, simpla d'utilisar e funcziuna per tut ils apparats finals: las novitads e l'agenda cumparan directamain sin la pagina d'entrada e dattan a l'utilisader ina buna survista – per exempel davart proximas sedutas da cumissiun, occurrenzas e sessiuns.
Quel che vul tschertgar ina fatschenta en Curia Vista, protocols verbals en il Bulletin uffizial u biografias da commembers dals cussegls, po profitar d'ina nova moda da tschertgar. Ils cuntegns da la tschertga èn da nov filtrabels tenor giavisch. Ed ultra da quai po l'utilisader activar communicaziuns automaticas per e-mail davart singulas persunas u fatschentas.
Er il Bulletin uffizial ha amplifitgà ses service: betg mo ils protocols verbals èn accessibels gia suenter curt temp, mabain da nov era las registraziuns da video da las debattas en ils cussegls. Singulas sequenzas da video pon vegnir telechargiadas ed integradas en autras paginas-web u chanals da social media.
Disponibla senza barrieras ed en tschintg linguas
Umans impedids da vesida profitan da l'access senza barrieras a la pagina-web. Quel permetta er ad els da navigar facilmain sin parlament.ch. Ed igl è tuttina, schebain Vus preferis il rumantsch, tudestg, franzos, talian u englais – la pagina stat a disposiziun era vinavant en questas tschintg linguas.
Ulteriuras infurmaziuns ed in'emprima impressiun da la nova pagina-web dal parlament survegnis Vus en il
video d'infurmaziun.
Berna, ils 18 da favrer 2016 Servetschs dal parlament