Era quest onn vegn il di da la festa naziunala svizra festivà cun in spezial «di da las portas avertas» en l’edifizi dal parlament. Tranter las 8.30 e las 16.30 èn visitadras e visitaders interessads envidads d’emprender ad enconuscher pli datiers l’edifizi istoric ed il manaschi parlamentar. L’entrada è pussibla fin a las 15.30 tar la porta d’osps e la porta principala.
In punct culminant da l’occurrenza è il barat persunal cun ils presidents dals cussegls. A partir da las 12.00 dat la presidenta dal Cussegl dals chantuns Eva Herzog a las visitadras ed als visitaders da la «Chombra pitschna» invista exclusiva en la lavur dal Cussegl dals chantuns. Suenter suonda en la sala dal Cussegl naziunal ina discussiun davart temas actuals da la politica svizra cun il president dal Cussegl naziunal Eric Nussbaumer. En quest reguard dattan ils dus politichers resposta a las dumondas dal public. Quest discurs moderà da Philipp Burkhardt, il manader da la redacziun da la Chasa federala da SRF, è da las 13.00 fin a las 13.45 e vegn translatada simultanamain en franzos e talian.
Il «di da las portas avertas» porscha a las visitadras ed als visitaders sper il dialog captivant cun ils presidents dals cussegls in program accumpagnant multifar. Guids tras l’edifizi dal parlament, in audioguid per explorar individualmain la Chasa federala, producziuns musicalas sco er in program per uffants multifar cun concurrenzas, tattoos e buttuns da far sez chaschunan per in di plain variaziun e bunas regurdientschas.
L’entrada a l’occurrenza è libra. I saja dentant menziunà ch’i na po betg vegnir exclus temp da spetga tar la controlla da segirezza en cas d’in grond dumber da visitaders. Persunas da passa 16 onns èn supplitgadas da preschentar in document d’identitad u pass valaivel.
Ulteriuras infurmaziuns davart l’occurrenza dal 1. d’avust en l’edifizi dal parlament chattais Vus qua.