Ils Servetschs dal parlament avran puspè las portas da l'edifizi dal parlament il di da la festa naziunala. Il 1. d'avust, da las 9.00 fin las 16.00, pon las visitadras ed ils visitaders ir a guardar libramain la sala dal Cussegl naziunal e la sala dal Cussegl dals chantuns, la halla da la cupla e la sala dals pass pers.
Da las 10.00 fin las 11.00 stat a disposiziun il president dal Cussegl naziunal Stéphane Rossini en la sala dal Cussegl naziunal durant in'ura per respunder las dumondas dal public. Il moderatur Philippe Flück (schurnalist tar l'Agentura telegrafica svizra) maina la discussiun. Tar differents posts d'infurmaziun pon ils giasts sa laschar orientar davart l'edifizi istoric e modern.
Il rom musical mettan, entaifer ed ordaifer l'edifizi dal parlament, la furmaziun «Fleuve Congo» dal Vallais, «Pipe and Drums of Jura» dal Giura ed il duet da dunnas «Alphorn2 syydefyn» da Berna. Plinavant vegnan «persunalitads bernaisas famusas» (acturas ed acturs da StattLand) a visitar sur mezdi l'edifizi dal parlament. Per uffants vegn organisà in pitschen percurs «Nua-è-??». Il café «Zeitungszimmer» è avert.
Berna, 14 da luglio 2015