Program
Ils 15 da matg 2019 è il Di internaziunal da la famiglia. Per quest motiv avran ils Servetschs dal parlament sonda, ils 18 da matg 2019, la Chasa federala cun differentas purschidas per uffants.
Globi en la Chasa federala
Da las 10.00 fin las 16.00 è in giast tut spezial sin visita en la Chasa federala: Globi! Tgi sa nua ch’el sa zuppa? Laschai far ina fotografia ensemen cun el e prendai a chasa il maletg sco regurdientscha.
Visitas guidadas per famiglias
Durant il di da las portas avertas han lieu visitas guidadas per uffants e lur geniturs. L’edifizi dal parlament e la politica naziunala vegnan declerads en ina lingua adattada per uffants. La visita dura var 45 minutas.
Maximalmain 30 persunas per visita, inscripziun al lieu.
Uras e linguas da las visitas guidadas
- 10.00 tudestg
- 11.00 franzos
- 13.00 tudestg
- 14.00 talian
- 15.00 tudestg
Vendita dal cudesch «Globi e la democrazia»
Vendita dal cudesch «Globi e la democrazia» (en tudestg) ch’è cumparì dacurt. Al stan da cudeschs en la halla a cupla survegnis vus in cudeschet da malegiar. Vegni sperasvi!
© 2018 Globi Verlag, Zürich
Bar da sirup en il Café Vallotton
L’anteriur «Zeitungszimmer» è avert per vus. Giudai insatge da baiver e da mangiar en in ambient cun stil. Uffants survegnan in sirup gratuit a la bar.
Ulteriuras infurmaziuns
Visita libra da l’edifizi
Las duas salas dals cussegls sco er la halla a cupla e la sala dals pass pers pon vegnir visitadas libramain. Il team da las visitas dal parlament infurmescha al lieu davart il funcziunament dals cussegls e davart l’istorgia da l’edifizi dal parlament.
Exposiziun «100 onns proporz»
Ils 13 d’october 1918 ha il pievel svizzer acceptà l’iniziativa dal pievel davart l’introducziun da l’elecziun da proporz dal Cussegl naziunal. La cumposiziun tenor partidas politicas è sa midada massivamain cun las elecziuns anticipadas in onn pli tard. L’exposiziun dat in sguard enavos, regorda ad eveniments cun bleras consequenzas, sco per exempel a la fin da l’Emprima Guerra mundiala ubain a la chauma generala svizra, e dat ina invista da las circumstanzas da viver da quella giada. L’exposiziun po vegnir visitada libramain.